پہلگام واقعہ پر وزیردفاع خواجہ آصف کی بھارت کواقوام متحدہ کا تحقیقاتی کمیشن بنانے کی پیشکش

فوٹو : فائل

اسلام آباد : پہلگام واقعہ پر وزیردفاع خواجہ آصف کی بھارت کواقوام متحدہ کا تحقیقاتی کمیشن بنانے کی پیشکش سامنے آئی ہے اور انھوں نے بھارت کو یہ پیشکش نجی ٹی وی چینل کے پروگرام میں گفتگو کرتے ہوئے کی ہے.

وزیر دفاع خواجہ آصف نے جیو نیوز سے گفتگو میں کہاکہ یا تو دو تین ملک مل کر تحقیقات کرلیں یا پھر اقوام متحدہ کا کمیشن بنادیں۔

خواجہ آصف کا کہنا تھا کہ بھارت تحقیقات کی پیشکش اس لیے قبول نہیں کررہا ہےکہ خوف ہےکہ کچھ اور نہ نکل آئے، بات چیت کے امکان کو کسی بھی حالات میں خارج از امکان قرار نہیں دیا جاسکتا.

انھوں نے کہا کہ کشیدگی جتنی بھی ہو مذاکرات کا راستہ اپنایا جاتا ہے، وزیردفاع خواجہ آصف کا کہنا تھا کہ پاک بھارت تصادم کا امکان کم ہوا ہے مگر بھارت میں اس وقت بہت بوکھلاہٹ ہے.

خواجہ آصف کا کہنا تھا کہ ساری دنیا کہہ رہی ہےکہ معاملہ بات چیت سے حل ہونا چاہیے، امریکا، روس، چین، ترکی، ایران یا کوئی بھی ملک اس تحقیقات کی ابتدا کرے۔

انہوں نے سوال اٹھایا کہ پہلگام میں ایک طرف واقعہ ہو رہا ہے اور 10 منٹ میں ایف آئی آر درج ہوگئی، پہلگام واقعے کی ساکھ پر بھارت کے اندر سے ہی کریک پڑگئے ہیں۔

پاکستان کے وزیر دفاع خواجہ آصف کا کہنا تھا کہ اس وقت حکومت پاکستان کی جانب سے مشیر قومی سلامتی کے تقرر کا مذاکرات کے معاملے سے کوئی تعلق نہیں ہے.