فوٹو : سوشل میڈیا
جنوبی بحیرہ چین میں ایک غیر معمولی واقعے کے دوران امریکی بحریہ کے طیارہ بردار جہاز یو ایس ایس نیمٹز پر تعینات ایک ہیلی کاپٹر اور ایک لڑاکا طیارہ اتوار کی دوپہر محض 30 منٹ کے وقفے سے حادثے کا شکار ہو گئے۔
امریکی بحریہ کے بحرالکاہل بیڑے (Pacific Fleet) کے مطابق، پہلا حادثہ دوپہر تقریباً 2:45 بجے پیش آیا جب ایم ایچ-60 آر سی ہاک (MH-60R Sea Hawk) ہیلی کاپٹر معمول کی پرواز کے دوران سمندر میں گر گیا۔ تین رکنی عملے کو فوری ریسکیو آپریشن کے ذریعے بحفاظت نکال لیا گیا۔
تقریباً 30 منٹ بعد، ایف/اے-18 ایف سپر ہارنیٹ (F/A-18F Super Hornet) لڑاکا طیارہ بھی حادثے کا شکار ہو گیا۔ دونوں پائلٹس نے ایجیکٹ کر کے اپنی جانیں بچائیں اور بعد ازاں بحریہ کے اہلکاروں نے انہیں بحفاظت جہاز پر واپس لایا۔
بحریہ کے ترجمان کے مطابق، “تمام پانچ اہلکار محفوظ اور مستحکم حالت میں ہیں۔” دونوں حادثات کی وجوہات جاننے کے لیے تحقیقات شروع کر دی گئی ہیں، تاہم فی الحال یہ واضح نہیں کہ آیا یہ دونوں واقعات ایک دوسرے سے منسلک تھے یا محض اتفاقیہ حادثات ہیں۔
یو ایس ایس نیمٹز اس وقت امریکی ریاست واشنگٹن کے نیول بیس کٹساپ (Naval Base Kitsap) کی جانب واپس جا رہا تھا۔ یہ جہاز کئی ماہ تک مشرقِ وسطیٰ میں تعینات رہا، جہاں اسے یمن کے حوثی باغیوں کی جانب سے تجارتی جہازوں پر حملوں کے جواب میں امریکی بحری آپریشن کا حصہ بنایا گیا تھا۔
یہ نیمٹز کی آخری تعیناتی سمجھی جا رہی ہے، کیونکہ جلد ہی اسے سروس سے ریٹائر کر دیا جائے گا۔
رپورٹس کے مطابق، امریکی بحریہ کو حالیہ برسوں میں متعدد مشینی خرابیوں اور انسانی غلطیوں کے باعث مختلف حادثات کا سامنا رہا ہے۔ رواں برس کے آغاز میں بھی یو ایس ایس ہیری ایس ٹرومین (USS Harry S. Truman) پر متعدد واقعات پیش آئے تھے، جن میں طیارے پھسل کر یا لینڈنگ میں ناکامی کے باعث سمندر میں گر گئے تھے۔ خوش قسمتی سے ان تمام واقعات میں کوئی جانی نقصان نہیں ہوا۔
ماہرین کا کہنا ہے کہ اس طرح کے واقعات امریکی بحریہ کی تکنیکی کارکردگی اور تربیتی نظام پر سنجیدہ سوالات کھڑے کر رہے ہیں۔ بحریہ کے مطابق تمام حالیہ حادثات کی تفصیلی تحقیقات جاری ہیں اور ان کی حتمی رپورٹ جلد جاری کی جائے گی۔
چین میں امریکی طیارہ بردار جہاز پر30 منٹ میں ہیلی کاپٹر اور لڑاکا طیارہ تباہ ہوگیا
تبصرے بند ہیں.